منتديات مملكة الحب


    قصة كويتيه

    شاطر
    avatar
    نار الظلام
    مشرف منتدى السيارات
    مشرف منتدى السيارات

    عدد الرسائل : 779
    تاريخ التسجيل : 01/04/2008

    default قصة كويتيه

    مُساهمة من طرف نار الظلام في السبت 05 أبريل 2008, 9:25 pm

    --------------------------------------------------------------------------------

    السلام عليكم ورحمه الله وبركاته
    اليوم يبت لكم قصه حيل حلوه
    بصراحق قريتها وعجبتني
    وان شاء الله تعجبكم
    تعريف بابطال القصه

    ( جود بنت محمد الهارفي ) بنت عايله من اغنى العوايل الكويتيه الكل كان يفتخر فيها ، وكانت محط انظار الكل ، والكل يشهر على اخلاقها وجمالها ، جود عمرها 20 سنه طالبة بكلية الهندسة ، تتميز يجمالها العربي الاصيل ، العيون السود الواسعه ، شفايفها صغار ورديه ، خشمها حد السيف وصغير ، خدودها متورده دايم كونها خجوله مع الناس ، الشعر الاسود الطويل لين اخر ظهرها ، مدرج وناعم ، والقوام المشدود ، وفوق هذا كله الله وهبها صوت مخملي يسحر اللي يكلمها ولون برونزي يشبه رمل البحر بعز الشمس ، كانت حلوة بمعنى الكلمه ، و كانت ذكية ومثقفه ومن احسن بنات الكلية .

    أم فهد الهارفي إهيا ام جود عندها من العيال غير جود : فهد ، شهد ، رغد ،، تحب زوجها لحد الموت ، وحاطته بعيونها ومستحيل تعصي له امر ، وربه بيت من الدرجه الاولى وعارفه شلون تحفظ بيتها وعيالها.

    رغد البكر 25 سنة متزوجه ومسافرة مع زوجها (مبارك) إيرلنـدا لانه يدرس طب اسنان ، وبين فترة وفتره تزور اهلها ، كانت مملوحه شعرها مموج ، بشرتها بيضه ، ملامحها حاده وحلوة كانت تشبه ابوها وايد ، طبعا يوم تزوجت ماتت بجي ليش بتفارق اهلها وبتعيش بره فتره مو قصيره ، كانت اكثر خواتها حساسيه وتتأثر بسرعه.

    فهد 23 سنه إطفائي ، حنطاوي طويل ، جسمه رياضي ، قوامه معتدل ، بنات العايلة يسمونه توم كروز الهارفي
    كانو البنات لا شافوه يتمنون قربه ، بس كان ثقيل وما يعطي ويه ، ضحكته تسحر البنات ، والشباب يتمنون نص جماله ، كان جماله عربي واذا غــّتر يصير جنان يعني صعب تقارنونه بأحد وفوق هذا كله كان خلوق .

    شهد وبالاحرى شهوده كانت دلوعه بن الهارفي لانها الصغيره بالبيت بنت الـ 17 سنه طالبه بالثنويه ، عيونها كبيرة ، بنيه غامجه ، شعرها قصير ناعم وحلجها صغير،دلوعه وحلوة ، شطورة بالمدرسه ، ومدرساتها يحبونها لانها حبوبه وجريئه وعندها اسلوب بالحجي .

    ابو فهد الهارفي ( محمد ) اهو الاكبر بين اخوانه ، ومعروف بتربيته السنعه حق عياله ، والكل شاهد له ، ام فهد تصير بنت عمه كان يحبها بدون ما تدري وتقدم لها وتزوجو ويابو العيال .
    ********************************
    أم فهد : شهد .. شهده .. روحي شوفي جود وينها فيه ؟
    شهد : يما تلاقينها تدرس بالحديقه ، هذي ام قليب اربع وعشرين ساعه تدرس لا تحاتينها .
    ام فهد : ويه حسبي الله عليج لا تنظلينها قولي ما شاء الله .

    بنفس الوقت دخل ابو فهد البيت مع ولده فهد توهم راجعين من عزيمه اخوه جاسم .
    شهد : هلا الغالي هلا ... حيا الله ابوي .
    ابو فهد : هلا فيج هلا بالغاليه
    وصعد داره لانه شكله كان تعبان بنفس الوقت دخلت جود الصاله والشعر مرفوع لي فوق وخصلاتها نازله على ويهها وحاطه القلم ورا اذووها باست ابوها على راسه واهو كمل طريجه وصعد فوق .

    جود : شعندكم محتشرين هني ليش ما ناديتوني ؟ ولا تبوني اروح ؟ ( بدلع )
    شهد : أي والله لو تروحين احسن وتـ ..
    قاطعتها ام فهد بحنيه : لا يا عيوني تعالي قعدي ويانا يا شمعه الجلاس وان ما شالتج الارض تشيلج العين .

    جود تطالع شهوده وتحرها بعيونها
    جود : شفتي شلون . امي تبيني موتي قهر يا بنت الثنويه ههههه
    شهد : هـ هـ هـ .. ملاقه ( واهي ماده البوز )
    جود راحت يم اختها وباستها وقرصت خدودها ،،
    جود : يالغيوووره يا شهده تغارين من اختج ها
    شهد استحت على ويهها وحست انها وايد شرانيه ، صارت خدودها حمرت وطالعت جود بطرف عينها اللي كانت قذلتها مغطيتها.

    جود : إلا اقول يما انا باجر بطلع شوي مبجر لان بمر المكتبه العامه بشوف لي جم كتاب لان
    الدكتور كلفني ببحث وبسويه ان شاء الله اروح الصبح بس بشوف محبوب سايقنا لان سيارتي الوالد وداها الكاراج.
    ام فهد : خلاص ماشي يا اكبر مهندسة بالدنيا كلها بس قولي حق ميري تقعدج الصبح عشان ما تروح عليج نومه .
    فهد : اذا تبين انا اوديج تره عادي بدال هالمحبوب باشا تره انا خدماتي بالسنه مره واذا رفضتي انتي الخسرانه لان ملك جمال الكون ودرب التبانه قرر يوديج وانتي رفضتي .
    جود : وييييييهك فهيد يالجيكر بس ماني قايله لأ،لاني صراحه مالي خلق محبوبو يتميلح على صماخي من الصبح .. ودام الهيئه العامه للخدمات والتوصيل الاستاذ فهد بن محمد تكرم وبيوديني فأنا موافقه . (( واهي شاقه الحلج ))
    شهد (( ماده البوز شبرين )) :لااااا ،،وانا منو يوديني المدرسه ؟ جود سيارتها خربانه وفهد بيودي جود لايكون بتخلون السايق يوديني ؟؟!! لا مابي السايق يفشل ..
    فهد: يا ذكائج يا شهدو الصبح منو بيشوفج ؟ خليها بالهده احسن لج .. بالهده رفيجاتج يكونون كلهم موجودين فأنا أيي اخذج بالهده احسن .
    شهد ( افتشلت) : انزين يالله انا عيل دامي ضمنت السالفه بروح انام تصبحون على خير ..
    ام فهد : وانتي من اهله .. وانتو بعد شمقعدكم روحو نامو احسن لكم ؟؟
    جود : أي والله على شورج بروح انام وراي قعده من الصبح، وانت فهود قوم عشان توديني ، تصبحون على خير .
    فهد : يالله سرينا ، تصبحون على خير .
    ام فهد : وانتو من اهله يا وجوه الخير .

    الكل راح داره ،، ام فهد نادت ميري تنظف الاغراض اللي طايحه وقالت لها تقوم جود الصبح وصعدت فوق .. دخلت الدار ولا تشوف بو فهد على السرير ويتعرق ..قربت منه تكلمه ما يرد ..

    ام فهد : بو فهد .. محمد .. محمد .. رد علي !!


    هذا البارت الاول اذا تبون اكملها ردو علي
    ناطره ردودكم
    avatar
    مصدر حنان
    "


    انثى
    عدد الرسائل : 408
    العمر : 33
    تاريخ التسجيل : 01/04/2008

    default رد: قصة كويتيه

    مُساهمة من طرف مصدر حنان في الأحد 06 أبريل 2008, 12:55 am

    وليه لأ كملي


    _________________
    ياااااااااااااارب حققلي أحلامي وأسعدلي أيامي


    avatar
    الفارس
    مشرف المنتدى الاسلامي
    مشرف المنتدى الاسلامي

    ذكر
    عدد الرسائل : 327
    تاريخ التسجيل : 07/04/2008

    default رد: قصة كويتيه

    مُساهمة من طرف الفارس في الثلاثاء 08 أبريل 2008, 2:39 pm

    يعطيك العافية ع القصه

    أخوك:.

    الفارس
    avatar
    نار الظلام
    مشرف منتدى السيارات
    مشرف منتدى السيارات

    عدد الرسائل : 779
    تاريخ التسجيل : 01/04/2008

    default رد: قصة كويتيه

    مُساهمة من طرف نار الظلام في الإثنين 28 أبريل 2008, 10:31 am

    شكراااااااااااااااا


    _________________

      الوقت/التاريخ الآن هو الأحد 09 ديسمبر 2018, 5:30 pm